Үйлдвэржилтийн дөрөвдүгээр хувьсгал буюу Дижитал өөрчлөлтийн эрин үе эргэлт буцалтгүй иржээ. Сүүлийн 50 жилд хөгжсөн технологийн шийдлүүд бидний амьдралын хэрэглээнд нэвтрэн бидний нийгэм, соёл, улс төр, эдийн засаг, бизнесийн бүх харилцааг өөрчилж байна. Дасан зохицож чадсан нь шалгарч үлддэг болохоор энэхүү өөрчлөлтийг бид хүлээн зөвшөөрч, нутагшуулж, дасан зохицох шаардлага бий болжээ. Хэрэв дасан зохицож чадахгүй бол бид хоцрогдож, ялагдана. 2020, 2030, 2040 онд бидний нийгэм, улс төр, эдийн засгийн харилцаа ямар байх вэ? Бидний дараагийн үе ямар өрсөлдөх чадварыг бий болгосон байх хэрэгтэй вэ? Робот биднээс ямар ажлуудыг авах вэ? Бид энэхүү дижитал хувьсгал(өөрчлөлт)-ын үед хэрхэн дасан зохицож, өөрчлөгдөх хэрэгтэй вэ? гэх мэт олон асуултууд биднээс хариултаа нэхэн хүлээж байна.

Манай улсын хувьд дижитал өөрчлөлттэй хөл нийлүүлэн алхах олон алхмууд хийгдэж буй ч цаашид хийгдэх шаардлагатай олон ажлууд байна. Компаниудын гүйцэтгэх захирлуудад зориулан “Та дижитал өөрчлөлтөд бэлэн үү?” арга хэмжээг 5-р сарын 30-нд Эмпасофт компани амжилттай зохион байгууллаа.

Энэхүү арга хэмжээнд нийт 40 орчим байгууллагын гүйцэтгэх захирлууд уригдан дижитал өөрчлөлтүүд, дижитал эрин үеийн бидэнд олгож байгаа боломж, дижитал хэрэгслийн хэрэглээ сэдвүүдээр илтгэл тавьж хэлэлцүүлэг өрнүүлсэн юм.